BACCHUSKLUP HÄÖR

Op ‘nne verlòre zunjigaovendj  örges nao de kirmis van 2009 zoote ’n deil men biejein op häör vaste plek biej kefee Wat en Halfwat op de Dörpsjtraot. Ze kalde äöver de Vastelaovendj en vonje ’t jaomer det er zo weinig te doon woor väör de get aojere jeugd oet ’t dörp. Väöl ginge d’r mèt die daag richting Remunj. Zou ’t neet sjoon zeen as wae in eige dörp get organiseerde. Nao de neudige pilskes kwame de meist gekke ideën väörbiej. Ein van de men dae waal ’s väör zien werk biej feestjes in Remunj kwoom, kwaam oeteindelik mèt ’t winnende idee. Waorom beginne wae neet òs eige Bacchusklup? In ’t begin werde d’r get gelache mèt dit idee maar wie later op de aovendj wie sjooner ze ’t vonje. In de waeke daonao ginge de oprichters aan de sjlaag. D’r wirde get technische luuj, ‘nne financiele sjlummerik mer auch get dwaze väör de sjtomme kal biej gevraogd. Toen koste ze aan de gang. Op ‘nne geheime vergadering in Nunhem besjlaote ze om Sam als eerste Bacchus te vraoge. Op 28 november 2009 waas ’t zo ver en wirde Bacchus Sam 1 ( toen nog op ’n besjeide mèneer) oetgeroope. Vanaaf det moment waas ’t hek van de dam.